15 qazanda Qazaqstan Respýblıkasynyń Reseı Federasıasyndaǵy elshiliginde qazirgi qazaq poezıasy men prozasy antologıasynyń orys tilindegi nusqasynyń tusaýkeser rásimi ótti.

Qazaq ádebıeti jınaǵynyń orys tiline aýdarmasy men basylymyn kórkem aýdarma salasyndaǵy tájirıbeli reseılik mamandardyń qatysýymen Reseı jazýshylar odaǵynyń Máskeý qalalyq bólimshesi men Máskeý memlekettik ýnıversıtetiniń baspasy oryndady. Antologıalarǵa alǵysózdi Reseıdiń akademıalyq qoǵamdastyǵynyń kórnekti ókilderi jazdy. Mysaly, proza antologıasyna Máskeý memlekettik ýnıversıteti fılologıa fakúltetiniń prezıdenti, fılologıa ǵylymdarynyń doktory Marına Remnóva alǵysóz arnasa, qazirgi qazaq poezıasynyń jınaǵyna alǵysóz jazǵan – A.M. Gorkıı atyndaǵy Álem ádebıeti ınstıtýtynyń dırektory, fılologıa ǵylymdarynyń doktory Vadım Polonskıı.

Máskeý memlekettik ýnıversıteti baspasynan jaryq kórgen qazaq prozasy men poezıasynyń jınaqtary orys tilinde sóıleıtin 14 memlekettiń 3,5 myńnan asa kitaphanasyna, ýnıversıtetteri men ǵylymı ortalyqtaryna jetkiziledi.

Tanystyrylymǵa Reseı Federasıasy Prezıdentiniń aımaqaralyq jáne mádenı baılanystar basqarmasynyń basshysy Vladımır Chernov, Reseı jazýshylar odaǵynyń basshylyǵy, sondaı-aq aýdarmashylar, ádebı redaktorlar, synshylar men sholýshylar qatysty. Qazaqstan tarapynan sharaǵa QR Prezıdentiniń kómekshisi, «Rýhanı jańǵyrý» baǵdarlamasyn júzege asyrý boıynsha Ulttyq komısıa hatshysy Aıda Balaeva, QR Reseı Federasıasyndaǵy Tótenshe jáne ókiletti elshisi Imanǵalı Tasmaǵambetov, Ulttyq aýdarma búrosynyń atqarýshy dırektory Raýan Kenjehanuly, Qazaqstan Jazýshylar odaǵy tóraǵasynyń orynbasary Aqberen Elgezek qatysty.

Zamanaýı qazaq ádebıetiniń úzdik úlgileriniń BUU 6 tiline aýdarmasy «Jahandaǵy zamanýı qazaqstandyq mádenıet» jobasy aıasynda júzege asyp otyrǵany málim. Joba, óz kezeginde, Qazaqstan Respýblıkasynyń Tuńǵysh Prezıdenti – Elbasy N.Nazarbaevtyń bastamasymen qolǵa alynǵan «Rýhanı jańǵyrý» baǵdarlamasynyń mańyzdy baǵyty bolyp tabylady. «Jahandaǵy zamanýı qazaqstandyq mádenıet» jobasynyń mindeti – qazirgi zamanǵy Qazaqstannyń ádebıet, mýzyka, beıneleý óneri, horeografıa, kıno jáne teatr salalaryndaǵy mádenı qazynalaryn álem jurtshylyǵyna tanystyrý.

Tanystyrylym saltanatynda sóz sóılegen Aıda Balaeva: Bizdiń jobamyz 2017 jyly sáýir aıynda Tuńǵysh Prezıdent Nursultan Nazarbaev usynǵan «Rýhanı jańǵyrý» baǵdarlamasynyń aıasynda júzege asýda. Onyń ózeginde zamanaýı álemde ulttyń básekege qabilettiligi onyń mádenı jáne ıntellektýaldyq potensıalymen ólshenedi degen oı jatyr. Búgingi tusaýkeser «Jahandyq álemdegi zamanaýı qazaqstandyq mádenıet» jobasynyń aıasyndaǵy jumystyń jemisi. Ol qazaqstandyq ádebıet, mýzyka, beıneleý óneri, teatr jáne kıno týyndylaryn álemge tanystyrýǵa baǵyttalǵan. Búgingi jobamyz júıeli túrde jalǵasyn taýyp, mádenıet aralyq qarym qatynastardyń ulǵaıýyna negiz bolady degen senimdemin». «Rýhanı jańǵyrý» baǵdarlamasynyń aıasynda 60 qazaqstandyq avtordyń tańdamaly shyǵarmalary tuńǵysh ret birden álemniń negizgi alty tiline aýdarylyp otyr. Jobany júzege asyrýǵa Ulybrıtanıa, Fransıa, Ispanıa, Egıpet, Qytaı jáne Reseıdiń jetekshi baspa uıymdary atsalysty. Antologıalar álemniń 90-nan asa eline, bes qurlyqqa taraıdy. Iaǵnı, buryn-sońdy dúnıejúzi oqyrmandarynyń qolyna túspegen  qazaq ádebıetiniń úzdik úlgilerimen 2,6 mlrd adam tanysýǵa múmkindik alady», – dedi.

Joba týraly:

«Rýhanı jańǵyrý» baǵdarlamasynyń bir baǵyty – «Jahandaǵy zamanaýı qazaqstandyq mádenıet» jobasy aıasynda qazirgi qazaq ádebıetiniń qos antologıasy aýdarylyp, jaryq kórdi. Olar – «Qazirgi qazaq prozasynyń antologıasy» jáne «Qazirgi qazaq poezıasynyń antologıasy». Ár antologıanyń kólemi – shamamen 500 betteı, árqaısysyna 30 qazaqstandyq avtordyń tańdamaly shyǵarmasy endi.